Buscar
  • Asociación Gascona

Uviéu pierde


Uviéu necesita decidir si quier ser una ciudá viva o muerta. La población avieyao, la emigración y la salida a ciudaes dormitoriu y distritos residenciales de les afueres ta dexando al centru y al cascu urbanu mui probe de movimientu. Si a eso sumamos los cambios nos vezos de la manera comprar y l'aumentu del comerciu electrónicu a xigantes de la distribución, danos como resultáu una ciudá con centros y exes comerciales vacios de tiendes.

Ún de los grandes atractivos d'una ciudá, d'Uviéu tamién, más p'allá del sitiu y los tesoros arquitectónicos, son los museos, el comerciu y la ufierta hostelera. Dende una perspectiva llocal, Uviéu siempre foi centru, capital, ciudá de comerciu y servicios referente pa toa Asturies. Dende Gascona reivindicamos, col nuestru mercáu mensual de La Gascuña, esa importancia del comerciu, del encuentru de los vecinos pa mercar productos del nuestru entornu cercanu, ellaboraos a la manera tradicional. Productos gastronómicos sostenibles, que seguren la población nel campu asturianu y que tán mui necesitaos d'escaparates.

Gracies al mercáu mensual nuestru, los uvieínos pudieron conocer productores nuevos y consumir más productos sanos, naturales y cuasi kilómetru cero. Eso significa modernidá. Apostar polos autónomos y les empreses pequeñes productores y comercializadores frente a los grandes productores y distribuidores mundiales. Apostar polo ecolóxico ye modernidá y futuru. Y tamién significa modernidá y progresu'l reivindicar la identidad de los productos asturianos y ofrecer a los vecinos d'Uviéu y a los visitantes lo meyor. Porque esos productos identitarios faen que la nuestra ufierta seya única y con ellos, amás, damos continuidá a la cultura de semar y collechar los productos qu'a lo llargo de sieglos nos dieron de comer, que fueron y son los pegoyos fundamentales de la gran gastronomía asturiana. Y tamién de la economía de la nuestra tierra.

Si se mira de manera global, ún de los problemes principales que tán pasando les urbes del sieglu XXI ye que toes ofrecen les mesmes ufiertes gastronómiques y comerciales: la uniformidá. El visitante encuentra lo mesmo en toles partes. Paez cómodo. Pero la verdá ye qu'esi modelu de ciudá (importáu d'Estaos Uníos) acaba con muncha riqueza y variedá llocal, y con munches esperiencies nueves que vivir. Si queremos qu'Uviéu nun seya una ciudá más, necesitamos ofrecer un comerciu y una hostelería vital, diferente, rica, variada y única.

La opinión de los vecinos

Un mercáu na cai ¿pue molestar a los vecinos? La respuesta ye que non. ¿A quién pue molestar un mercáu que se fai un domingu al mes de les 11 la mañana a les 3 de la tarde? ¿Na ciudá d'Uviéu nun son bien recibíos los llabradores, ganaderos y artesanos que vienen a enseñar y vender los productos d'ellos y que nun dan ruíos nin xareos? Ente los vecinos y residentes de la cai Gascona hai una mayoría que tán encantaos con que se faiga'l mercáu y otros, una minoría, a los que-yos molesta qu'esista. Los que sienten molesties por esti mercáu y denunciaron que se ficiera había da-yos vergüenza del resultáu de lo que ficieron.

Dende l'Asociación d'Hosteleros de la cai Gascona buscamos siempre l'entendenos colos vecinos y actuamos col fin de meyorar les actividaes nuestres nel beneficiu de toos. Siempre tamos abiertos a escuchar, falar les coses y meyorar. Hai otros canales de comunicación al marxe de los tribunales. Tal paez qu'hai vecinos de la nuestra cai a los que-yos molesta qu'esista Gascona como exa hostelera. A tolos vecinos d'Uviéu-yos pue llegar a molestar daqué de lo que pasa alredor. A dalgunos de San Llázaro molésta-yos tener un albergue de transeuntes, a otros de la Iría tener fútbol cada quince díis, a otros de Ciudá Naranco tener un distritu estranguláu poles víes del tren, a los de General Elorza tener ruíu de tráficu o a otros, los de Villaperi, el tener una planta depuradora de residuos. Tolos residentes de la ciudá disfrutamos d'unos servicios beneficiosos y convivimos con unos inconvenientes uníos a esos servicios por asentanos nuna urbe. Asina ye la vida en comunidá. Nun ye posible que toos tengamos la satisfación plena.

Queremos respetar les normes.

Sabemos bien que la función principal de los hosteleros de Gascona nun ye entamar mercaos, ye ofrecer una ufierta hostelera de calidá. Y tamos ofertándola. Pero hai años que decidimos ser un motor d'actividaes culturales y sociales paraleles a la cultura de la sidra y a la cultura gastronómica asturiana. Y tamién al ociu, a la música y al baille de la nuestra tierra. Por entamar estes actividades culturales Gascona nun gana perres, al contrario, invierte parte los beneficios. Y nos momentos duros de crisis económica recién siguimos invirtiendo y apostando por dar vida y actividaes culturales a la ciudá d'Uviéu. Hasta cuando les administraciones públiques dexaron d'invertir nestos campos.

Tamos mui contentos de tirar polo nuestro, de facer coses, y nun somos a entender que, dende abril del 2014, cuando nació'l mercáu de La Gascuña, les corporaciones que tuvieron al mandu la ciudá nun fueron quién a facer ná que valiera pa ellaborar una normativa reguladora nueva, una Ordenanza de venta ambulante nueva –nun pasaron de redactar un borrador que duerme la siesta nun caxón–, qu'actualice la que ta vixente, que quedó desfasada y superada poles iniciatives nueves de la ciudá.

Los reveses que tuviemos nos tribunales, y que van impedir que se siga faciendo'l mercáu nuestru, suponen l'aplicación de la norma al casu concretu que se somete a la xusticia. Pero la norma pue –y entendemos que tien que– cambiase. Y eso ye lo que pidimos a la corporación qu'acaba de salir de les urnes: que cambien les normes, que les actualicen, pa poder dar vida a la nuestra ciudá. Dase la paradoxa de que, en función de la normativa vixente, según los informes municipales, puen autorizase mercaos ocasionales y pa la venta o muestra de coses d'una clas namás. Pero nun caben mercaos periódicos nuevos de venta de coses de clases diferentes. ¿Tien sentíu que siga esta norma? L'Ayuntamientu de Xixón entama un mercáu de productos ecolóxicos mensual.

Queremos sumar, queremos futuru.

El mercáu d'El Fontán cumple una misión histórica y ye la referencia de mercáu con puestos al aire dende qu'Uviéu ye Uviéu, los xueves, sábados y domingos. Pero demostramos que nun ye l'únicu que cabe na ciudá. Na Gascona consiguimos emburriar y asentar otru con ésitu de públicu, que ye complementariu al rastru y mercáu de los domingos, que cubre un güecu que dexa'l descansu merecíu selmanal de los comerciantes y que permite ofrecer a la ciudadanía y a los turistes que nos visiten un domingu productos gastronómicos de la nuestra tierra y buenes esperiencies. Porque toos lo vivimos dalguna vez: nun hai ná menos atractivo que llegar a una ciudá a visitala con tol comerciu ciarrao.

Por desgracia, a día d'hoi, Uviéu ye una ciudá con poca industria, con un comerciu en declive, con una Universidá con menos alumnáu cada cursu. Una ciudá que tá viviendo'l cierre del ciclu económicu que supunxo la primer industralización d'Asturies y la esplotación de les mines de carbón. Una ciudá descolocada, con equipamientos grandes y costosos sin usu, pero tamién con munchu potencial que necesita renovación y impulsos.

L'Uviéu decimonónicu nun va volver. La medría de los años 70 del sieglo XX nun va volver. Pero van venir otres oportunidaes, si sabemos aprovechales. Uviéu necesita idees nueves, iniciatives en munchos campos. Y tien qu'apostar pol sector turísticu como motor de la economía. Y dende'l Conceyu tienen que favorecese esos cambios, eses idees nueves que permitan un cambiu de ciclu económicu y social.

Tolos que visiten Londres, Lisboa, Madrid o Barcelona acuérdense de les esperiencies en dellos mercaos de domingu nes cais. Puntos p'alcontrase, d'actuaciones musicales, zones d'ociu, de comerciu y d'hostelería. Zones onde artesanos, productores y creadores contacten col públicu. Na dómina del e-comerce, los mercaos tradicionales y de calidá tienen más importancia que nunca. Son únicos. Duren unes hores namás y hai que los vivir. Añeden interés y dan valor a les ciudaes.

Los Hosteleros de Gascona queremos un Uviéu vivu. Con coses que facer y que ver tamién los domingos. Pero hai normes que nun mos dexen consiguilo. Y sabemos que les normes tán pa respetales. Pero tienen que ser xustes. Y tamién tienen que poder adaptase a les realidaes nueves que tienen que regular. Llevantar un eventu de la nada cuesta munchu trabayu y dedicación. Acabar con él ye muncho más fácil.

La cai Gascona pierde'l mercáu de La Gascuña y, con él, Uviéu tamién pierde: atractivu, centralidá, servicios, modernidá y una oportunidá grande. Y esta perda danos mucha pena como carbayones que somos, como uvieínos que trabayamos y vivimos nesa Vetusta que, visto lo visto, duerme la siesta mientres el progresu escapa.


20 vistas
logogascona20_edited.png

ASOCIACIÓN DE SIDRERÍAS DE LA CALLE GASCONA DE OVIEDO

© 2020 gascona.bulevar.sidra@gmail.com

De conformidad con lo dispuesto en la Ley Orgánica 15/1999, de Protección de Datos Personales, se informa que los datos personales facilitados se incorporan a ficheros responsabilidad de la ASOCIACION DE HOSTELEROS DE LA CALLE GASCONA DE OVIEDO, siendo necesaria su obtención para su tratamiento a los fines de mantenimiento de la relación como clientes, manteniéndole informado de las actividades y eventos que se organicen, así como para la gestión de las relaciones comerciales y contractuales, y la participación en promociones, sorteos, concursos o encuestas, lo que le será convenientemente informado en el momento de recogida de sus datos de carácter personal, solicitando su consentimiento expreso en el caso en que éste fuese necesario de acuerdo con lo establecido por el Reglamento General de Protección de Datos (UE 2016/679) y su normativa de desarrollo, y se comunicarán, en los casos establecidos por la Ley, a las administraciones competentes en materia fiscal. La dirección en la que puede ejercer los derechos de acceso, rectificación, cancelación y oposición es la siguiente: RESTAURANTE LA PUMARADA, calle Gascona nº 8, bajo, 33001 - Oviedo.